【作為傳媒同埋Influencer應有嘅智慧】
「HJ兩Q，賓周都損」嘅whatsapp原汁原味冇遮名cap圖，噚日好早已經有朋友sent嚟，有啲傳媒同埋page(Influencer)爭崩頭報道同埋share，打咗格仔嘅當然要讚，但直接post出嚟呃like嘅就真係要打屁股。
我:「康仔，你有冇嬲我當日cap你幅hihi圖?」
康仔:「屌，得我叫康仔咩，而家好L紅呀我，幫我搞個page吖。」
老粗即係老粗。
喺「HJ兩Q」前兩日，我都差啲中招，因為有同事whatsapp一張「生意失敗，夫妻平賣」嘅易拉架截圖俾我，想post之際發覺唔係好對路，有晒人哋兩公婆電話地址，我唔理佢哋因咩事欠債，我咁做咪即係幫緊班收數佬追數? 一個易拉架幾廿蚊，但用我哋每一個人嘅力量share，就等於一齊幫收數佬宣揚開去，呢鋪真係宣傳易。
好遺憾，我夜晚返到屋企，真係見到有其他page原汁原味post出街。
其實做page嘅一群Influencer，已經係半個傳媒，甚至比傳媒更有感染力，你睇下某啲報紙，你返工嗰陣喺便利店都係得3至5份，但放工返嚟都未賣晒。
曾經喺傳媒機構工作，錢就賺唔到架喇，記者編輯出晒名係人工低，永遠跑輸大市，連帶喺傳媒機構入面其他職位包括HR、Admin、發行、校對同埋執相嗰班美術都唔會高人工 (直情係低到一個點)，不過喺呢啲地方工作，你會長智慧，知道新聞應該點做，所以如果冇足夠嘅經驗同能力去衡量點樣報道，就唔好為咗個Like，令到無辜嘅人受傷害。「HJ兩Q」事件中，家長同小朋友係唔應該被開名同埋起底架。
Search